Амралтын өдрүүдэд зам тээврийн осол нэмэгдсээр байна

Замын цагдаагийн газрын жижүүрт өнгөрсөн амралтын өдрүүдэд осол, хэргийн шинжтэй 157 дуудлага ирсэн байна. Зам тээврийн ослоор хоёр хүн нас баржээ. Сэлэнгэ аймгийн Цагааннуур сумаас Түшиг сум руу явах замд нэг км-т ДВ-150 маркийн, улсын дугааргүй мотоцикл онхолдож, жолооч 20 настай М нас барсан. Уг осол зургадугаар сарын 18-ны 23.00 цагийн үед гарсан байна. Баянгол дүүргийн нутаг Энэбишийн өргөн чөлөө,”Сэрүүлэг” дээд сургуулийн зүүн урд замд Nissan Patrol маркийн 63-82 УБС дугаартай автомашины жолооч Н нь нэр, хаяг тодорхойгүй 65-70 орчим насны эрэгтэй, явган зорчигчийг дайрч амь насыг нь хохироосон хэрэг гарсан. Хүн гэмтсэн осол 19 гарч, 22 хүн хүнд, хөнгөн байдлаар гэмтэж бэртсэн байна. Тухайлбал, Баянгол дүүргийн нутаг Энэбишийн өргөн чөлөө, 1000-н нэрийн барааны дэлгүүрийн зүүн урд уулзварт Тoyota Marino маркийн 05-61 УБЛ дугаартай автомашины жолооч нь Hyundai Ехсеl 14-75 УБВ маркийн автомашинтай мөргөлдөж осол гаргасан. Ослын улмаас дөрвөн хүн гэмтсэн юм. Түүнчлэн эдгээр өдрүүдэд согтуугаар тээврийн хэрэгсэл жолоодсон 92 зөрчил илрүүлсэн байна.